อตฺเถ ญาณํ อตฺถปฏิสมฺภิทา, ธมฺเม ญาณํ ธมฺมปฏิสมฺภิทา, ตตฺร ธมฺมนิรุตฺตาภิลาเป ญาณํ นิรุตฺติปฏิสมฺภิทา, ญาเณสุ ญาณํ ปฏิภานปฏิสมฺภิทา’’ติ เอวมาทินา ภควตา จตสฺโส ปฏิสมฺภิทาโย สุตฺตนฺตภาชนียอภิธมฺมภาชนียปญฺหาปุจฺฉกสงฺขาเตหิ ตีหิ มหานเยหิ วิตฺถารโต วิภชิตฺวา เทสิตาฯ
ญาณวิภงฺค
ปุจฺฉา – โสฬสเม ปน อาวุโส ญาณวิภงฺเค ภควตา กถํ ญาณานิ วิตฺถารโต วิภชิตฺวา เทสิตานิฯ
วิสฺสชฺชนา – โสฬสเม ภนฺเต ญาณวิภงฺเค ‘‘เอกวิเธน ญาณวตฺถุ ปญฺจวิญฺญาณา น เหตู, อเหตุกา, เหตุวิปฺปยุตฺตา, สปฺปจฺจยา , สงฺขตา, อรูปา, โลกิยา, สาสวา’’ติ เอวมาทินา เอกกโต ปฏฺฐาย ยาว ทสกา ภควตา ญาณานิ วิตฺถารโต วิภชิตฺวา เทสิตานิฯ
ขุทฺทกวตฺถุวิภงฺค
ปุจฺฉา – อภิธมฺมปิฏเก อาวุโส วิภงฺคปฺปกรเณ สตฺตรสโม ขุทฺทกวตฺถุวิภงฺโค ภควตา กถํ เทสิโตฯ
วิสฺสชฺชนา – อภิธมฺมปิฏเก ภนฺเต ทุติเย วิภงฺคปฺปกรเณ สตฺตรสโม ขุทฺทกวตฺถุวิภงฺโค ‘‘ชาติมโท, โคตฺตมโท, อาโรคฺยมโท, โยพฺพนมโท, ชีวิตมโท’’ติ เอวมาทินา เอกกโต ปฏฺฐาย ยาว อฏฺฐสตตณฺหาวิจริตํ ภควตา วิตฺถารโต วิภชิตฺวา เทสิโตฯ